Լյուքսեմբուրգի վարչապետ Քսավյե Բետելը Twitter-ի իր էջում հայտնել է, որ Ուկրաինան և Մոլդովան ստացել են Եվրամիության թեկնածուի կարգավիճակ այսօր ԵՄ գագաթնաժողովի ժամանակ։
«Եվրախորհուրդը թեկնածու երկրի կարգավիճակ է շնորհել Ուկրաինային և Մոլդովային։ Պատմական պահ և հույսի ազդանշան ուկրաինացի (sic) ժողովրդի համար»,- գրել է վարչապետը։
Անցյալ շաբաթ Ուկրաինայի ԵՄ անդամակցության հայտը ճնշող մեծամասնությամբ պաշտպանեց Եվրոպական միության հանձնաժողովը, իսկ այսօր ավելի վաղ Եվրախորհրդարանը վճռականորեն պաշտպանեց Մոլդովային և Ուկրաինային Եվրամիության թեկնածուի կարգավիճակ տրամադրելու առաջարկը:
Եվրախորհուրդը նաև «որոշել է ճանաչել Վրաստանի եվրոպական հեռանկարը և պատրաստ է թեկնածուի կարգավիճակ տալ, երբ լուծվեն առաջնահերթությունները», - ասել է Եվրոպական խորհրդի նախագահ Շառլ Միշելը:
Բելգիայի վարչապետ Ալեքսանդր դե Կրոուն գագաթնաժողովից առաջ ասել է, որ Ուկրաինային ԵՄ-ի թեկնածուի կարգավիճակ տալը կարևոր «խորհրդանշական ուղերձ» է Կիևին աջակցելու համար՝ Ռուսաստանի կողմից Ուկրաինայի դեմ մղվող ագրեսիայի սարսափելի պատերազմի պայմաններում:
Ուկրաինայի նախագահ Վլադիմիր Զելենսկին ողջունել է Եվրամիության որոշումը՝ Ուկրաինային թեկնածուի կարգավիճակ տրամադրելու մասին՝ զարգացումն անվանելով «եզակի և պատմական» պահ։
«Անկեղծորեն ողջունում եմ ԵՄ առաջնորդների որոշումը [Եվրախորհրդի գագաթնաժողովում]՝ Ուկրաինային թեկնածուի կարգավիճակ շնորհելու վերաբերյալ: Դա եզակի և պատմական պահ է Ուկրաինա-ԵՄ հարաբերություններում»,- գրել է Զելենսկին Twitter-ում:
